算命點解愈睇愈亂？

最近有位客人問我：「有師傅話我缺金水，做會計銀行好；但你話我缺木水，做美甲手藝反而啱，點解兩個講法唔同？」

首先，感謝客人真誠嘅發問。呢個問題，其實正正指出咗而家好多人睇命會遇到嘅一個盲點：

🎯學理派 vs 實戰派

有啲師傅讀書好叻，熟讀命理書籍，但缺乏人生經驗同實戰臨床，容易變成只係用書上定式解八字。見你命局冇金，就話你「缺金」，要補金；然後話「金就係會計銀行、金銀珠寶」，就好似照住五行分類配對行業咁簡單。但八字，唔係填色遊戲。重點唔係有冇金，而係金出現對你成個命局係補定害？你而家走緊咩大運？流年有咩變化？你八字真正需要嘅五行係咩？呢啲全部都要一齊分析。好似今次客人咁，佢命局真正偏弱係木，而木一方面代表創造力、藝術觸覺，另一方面亦能疏通土氣，配合佢而家行緊嘅運，反而係手藝、美感相關嘅行業能帶動運勢，唔係單睇「金＝錢」。

🎯 『算命』唔可以人云亦云

要用八個字+運勢+人生背景「入腦」分析，而唔係揸住一本書逐樣對。正如有啲人學八字十幾年，依然一嚿雲——因為未理解命理背後真正嘅「人性」。

如果你都曾經睇命睇到愈睇愈亂，記得唔好被「表面五行」誤導，搵到真正明你命局氣場、又能結合實際經驗嘅師傅，先係通往清晰人生路嘅關鍵。